PROJECT UPDATE | VUNITAVOLA SUBDIVISION – NEARING COMPLETION
May 29, 2025
TEAM VANUA CROWNED BOWL CHAMPIONS AT 2025 BUSINESS HOUSE VOLLEYBALL COMPETITION
June 5, 2025
Na Mataqali o Vatuba era itaukei ni qele e Monasavu, na vanua ka dabe tiko kina na ivakaso ni wai levu duadua e Viti ka qaqia tiko na livaliva e Viti Levu.
Ena 2024 era sa duavata kina na lewe 1000 vakacaca na lewe ni mataqali ena loma ni koro se itikotiko e Rewasau, Nasiriti, Naqelewai kei Savusavu ena tikina o Nabobuco e Naitasiri me sa sogo na nodra ilavo ka dau wasei tiko vakatautauvata (Equal Rent Distribution) me qaravi kina eso na veika me yaga raraba ki vei ira.
E kaya o Apisai Namotokalou e dua vei iratou na mata (se trustees) ni Mataqali ni sa oti oqo e 40 vakacaca na yabaki era sega tu ni vakila vakavinaka sara na yaga ni lavo ni lisi mai Monasavu me yacova mai na yabaki sa oti ni sa gole yani na vakailesilesi ni TLTB ena kena laki veivosakitaki na kena rawa ni vakayagataki vakavinaka na ilavo ni lisi oqo.
Ena macawa sa oti esa mai vakadonuya kina na Matabose ni Qele Maroroi e $64,000 na ilavo ni Mataqali o Vatuba me qaravi kina eso na ituvatuva ni veivakatoroicaketaki me vaka na:
• $21,000 na ivakaoti ni sau ni olo ni koro o Rewasau me saumi vakadodonu ki vei Vinod Patel (Home & Living);
• $29,000 isau ni duru paini mai vei Vinod Patel (Home & Living) me bai ni olo mai Savusavu;
• $5,000 me na biu ki na tobu ni Mataqali Vatuba ena Fijian Holdings Unit Trust.
• $8,000 me vakavinakataki kina na paipo ni wai, soli ni yasana kei na isau ni tamata cakacaka ena kea qaravi na veivakatoroicaketaki ena gadrevi ena loma ni koro.
Ena gauna oqo e taura tiko na mataqali e rauta ni $53,000 na ilavo ni lisi ena veiyabaki ia na ilavo e a mai vakayagataki ena yabaki oqo e rauta tiko ni $85,000 na ilavo ni mataqali ka vakatubutaki tu ena loma ni Matabose.
E kaya o Namotokalou ni sa tiko tale ga na ituvatuva ena kena qaravi vakaoti na sala simede (footpath) ena va na koro ka vaka kina na kena tara na nodra vale na iLiuliu ni Yavusa.
“Sa dua na ka na neimami marau ni keimami sa qai kila na dredre ni kena vakadodonutaki na veika e sa vatauca mai na Veitarogi Vanua ka sa dodonu ga me keimami cakacakavata ka veilomanitaka ga na veika e sa rawa mai na qele me vaka ga ni keimami sa mai volai vata tu.”
“Keimami sa taleitaka sara vakalevu na nodra dau siko yani na vakailesilesi ni Matabose ni keimami kila ni sa yaga tiko na veika keimami mai navuca vata tiko me baleti keimami kece na lewe ni Mataqali vakauasivi vei ira na luvei Vatuba ena veisiga ni mataka,” e tomana o Namotokula ka kaya.
Ena gauna oqo e sa sasaga sara tiko vakaukauwa na TLTB me ra vakaramaramataki vakavinaka na itaukei ni qele me rawa ni ra cakava eso na vakatulewa me vinaka kina na vanua kei na kena veiwekani vakauasivi vei ira na luveda era muri tiko mai.