MARAUTAKI VAKALEVU NA VEIVAKARARAMATAKI E RARALEVU

E a laki vakayacori na nodra bose ni veivula na manidia ena Matabose ni Qele Maroroi ni iTaukei ena vanua o Nacobua ena koro o Raralevu mai Tailevu ena Tusiti (16 ni Seviteba 2025); ka sa dua na ka na kena marautaki mai vei ira na lewenivanua.

E laurai na totoka ni nodra veilomani ena nodra tiko nanamaki na lewenikoro ka liutaka sara tu ga na Turaga na Roko Tui Namata o Ratu Paula Halaiwalu me tekivu mai na mataka me laki ena yakavi.

Era vakaisulu sote vulavula taucoko na kena turaga kei ira na cauravou; ka ra maqusa na marama ena kena vakarautaki na medra ti kei na kedra ivakasigalevu na lewe ni bose.

E kaya na Vunilewa ni Matabose o Solomone Nata ni oqo e ivakaraitaki ni veiliutaki vinaka ena itikotiko vakaturaga ka laurai votu kina na nodra qaravi ka vakamanataki tiko na itutu vakaturaga ena loma ni yavusa ka kovuta tiko na koro e rua o Raralevu kei Namata.

Ni oti na bose sa qai tekivu me qaravi e dua na veivakararamataki vei rau na koro e rua ka ra osodrigi yani na turaga, marama kei ira na kena cauravou kei na goneyalewa me ra laki rogoca na veika era nanamaki voli mai kina ena dua na gauna balavu.

Era a vosa taumada o Nata me vakaraitaka na veiveisau eso esa cavuikalawa kina na TLTB:

1. Dola ni Kabani Vou na Qele Maroroi Holdings Company Ltd

2. Dolavi na veivuke ni Taukei Development Fund Facility

3. Veivuke ni Taukei Wealth Fund

4. Veivuke vei ira na Gone ena Vuli

5. Veivuke ena Vuku ni Tuvatuva-Ka (vakayadudua, vaka-mataqali se vaka-kabani)

E tukuna na luvedra na Turaga na Roko Tui Namata o Ratu Jeremaia Halaiwalu ni sa mai dolava oqo na Matabose ni Qele Maroroi e dua na katuba ka sa na rawa kina me toso na kawa iTaukei ka cavu ikalawa ena buturara ni veivakatoroicaketaki me ra kune kalougata kina na gone era muri keda tiko mai.

Ki na Matabose ni Qele Maroroi oqo e dua na sota ni veivakararamataki levu duadua ka qai tarovi ga na taro; e kaya o Nata ni oqo e i vakaraitaki ni nodra gagadre na lewenivanua ena nodra sa via sikabotea yani na ilati ni bula dravudravua me ra qarava tale eso na ka me vaka na cicivaki bisinisi kei na vakatubuilavo.

E kaya o Peni Sokia e dua ka veiqaravi tale ga mai vakabalavu ena Tabacakacaka iTaukei ni oqo e dua na gauna era a waraka tu mai vakabalavu; ka sa inaki dina ga va-Kalou me yaco na veivakararamataki oqo me ra kalougata kina na vanua o Nacobua.

Ena vuku ni vanua o Nacobua era sa cavuta na Roko Tui Namata na nodra vosa ni veivakalougatataki kei na vakanuinui vinaka ki vua na Vunilewa kei ira era sa digitaki me ra veiqaravi ena taba ni gauna oqo ena loma ni Matabose me ra qarava na yasana e 14 ena noda Viti ena vuku ni kena vakayagataki na qele kei na iyau bula.