CEO ENGAGES WATER TAXI OPERATORS AT NASALI LANDING
January 22, 2026
GROUND-BREAKING CEREMONY FOR THE NEW VUDA PEACE PARK
January 23, 2026
Oqo na imatai ni nodra veisiko na Vunilewa ni Matabose ni Qele Maroroi ni iTaukei ena yabaki vou oqo 2026 ka tomani tiko ga kina na ilakolako ni nodra vakararamataki tiko na noda itaukei ni qele ena veitikina.
E a digitaki na tikina o Vutia, Rewa me talevi kina na koro e tolu ena loma ni tikina; wili kina o na koro o Muanaicake, Muanaira kei Laucala.
E kaya o Mr Nata ni veivakararamataki oqo e tiki tiko ni ituvatuva vou ka sagai me ra sikovi ka talevi tale kina o ira na noda itaukei ni qele; me laki vakatakilai tale mada ki vei ira na inaki ni kena tauyavu na Matabose, na itosotoso vou e sa tuvatuva-ka tiko kina na Matabose vei keda na iTaukei kei na kena tovolei sara ga me da semati tale na veiwekani ni Matabose kei ira na kena itaukei dina (na itaukei ni qele taucoko e Viti).
“Sa tekivu me keitou lakova yani kei iratou na neitou ivakailesilesi na veikorokoro, veitikina kei na veiyasana e Viti ena kena sagai mo ni vakararamataki na noda ena veika eso eda rawa ni da cakava me baleta na gagadre ni kena valuti na bula dravudravua ni kawa itaukei.
Era maqusa na Masi ni Vanua kei na Marama ni Vanua ena nodra tiko wawa kei na kena ciqomi na ilakolako oqo; vakauasivi ena kena laki qaravi na veitalanoa kei na veivakararamataki ena vuku ni vica na sasaga me vaka oqo:
• Vakalesui na nodra ivotavota na noda Turaga ena itutu ni veiliutaki vakavanua eso (Liuliu ni Tokatoka, Liuliu ni Mataqali, Liuliu ni Yavusa kei na Turaga ni Qali)
• Sa soli na galala vei ira na luveda e tiko na nodra ilavo ni lisi me ra kerea mai e 40% ni nodra ilavo me tosoi kina na nodra vuli (dina ga kevaka era se bera ni yacova na yabaki 18).
• Taukei Wealth Fund: na kena vakarautaki e dua na uma ilavo me tu vakarau me ra volia na itaukei ni qele eso na qele lisi sa mai cava tiko na kena lisitaki ena loma ni veitauni.
• Taukei Development Fund Facility (Baqe ni Taukei): na veivuke e rawa ni da kerea kina e dua na uma ilavo me tekivu kina na bisinisi ni tamata yadua, se itokatoka, mataqali, yavusa, tikina se yasana.
• TLTB Education Scholarship: soli na galala vei ira kece e volai na yacadra enai Vola ni Kawa Bula (VKB) me ra kerea me vukei ena nodra icurucuru ni vuli ena veivuli eso esa digitaki tiko.
E kaya o Mr Nata ni oqo na noda matanisiga vou na kawa iTaukei ka ra sa veivakadonui kina na noda Bose Levu Vakaturaga (BLV) me da tu vata ka me da tu vakaukauwa na kawa iTaukei ena noda dela ni vanua. Na noda Matabose na itaukei ni qele ena vukei keda kina; vakabibi ena veika eda dau leqa tu kina me vaka na kena vakailavotaki na noda sasaga.
E tolu ga na yavu e kau kina na sasaga ni veisau oqo kina na Bose Levu Vakaturaga ka ra sa veivakadonui mai kina oya na:
1. Veinanumi (Me da veinanumi va-kawa iTaukei)
2. Veilomani (Me da veilomani va-kawa iTaukei)
3. Veivueti (Me da vueti na Kawa iTaukei – mai na bula dravudravua)
Sa kena ibalebale me da sa veinanumi va kawa tamata vata, me da veilomani me rawa ni vueti na noda kawa tamata ni kua, kei na veisiga tawa kilai sa tu e matada ena vukudra na luveda kei makubuda.
“Ni sa gole yani na veivakararamataki, me da sa tucake me da lako yani e valenivolavola me da taro, ka me lako vata tiko ena tatadra; ena vanua eso eda via yacova. Na Matabose ni Qele Maroroi e nomuni, ka sa tu vakarau tale ga me vukei kemuni ena cava ga o ni gagadre kina me baleta na vakayagataki qele se na cicivaki bisinisi,” e tomana o Mr Nata.
