Siro na bosebose-ka vakayabaki ni Matabose ki na noda veikorokoro

E ra a laki tiko na veimanidia eso ena veiyasai Viti ka ra veiqaravi ena Matabose ni Qele Maroroi ena koro o Taci mai Noco, Rewa ena dua na bose me tuvani kina na ituvatuva ni cakacaka ni Matabose ena yabaki vou, 2025.

Era mani sureti kina na Vunisalevu na Turaga na Ratu na Tui Noco Ratu Aca Vulaidausiga me ra mai dolava na bose siga rua oqo.

E kaya o Ratu Aca ni oqo e se qai isevu ni gauna me mai caka kina e dua na bose vakaoqo ena loma ni vanua o Noco vakabibi ena nodratou koro e Taci.

“Sa dua na ka na neimami marautaka na kena vakasamataki na vanua oqo ena vuku ni tosotoso vou ni kawa itaukei keimami sa mai rogoca tiko e daidai.

“Keimami sa qai kila ni sa cabe na Matanitu o Viti kei na kena veiqaravi vakabibi ena ka e baleta na noda qele kei na kena kawa tamata. Ia ni mai digitaki na vanua o Bureonoco me mai qaravi kemuni e daidai ena vuku ni kena tuvani vakamatau nai tosotoso vou ni Matabose ena 2025, sa dua na ka marautaki dina vei keimami ni keimami sa mai tiki tale tiko ga ni sasaga me da vakavuderi mai vakavinaka na kawa itaukei ena kena vakayagataki na noda iyau bula me da bula vinaka kina vakauasivi ena bula ni veivuvale vakayadudua ena noda Viti.

E kaya na Vunilewa ni Matabose o Solomone Nata ni oqo e se qai karua ni koro e Viti me qaravi kina na bose vakayabaki ni Matabose (Annual Strategic Corporate Planning Workshop) ka a dau qaravi tu ga ena veiotela eso kei na veitauni e Viti.

“Ia oqo keimami sa siro sobu sara ga mai vei kemuni na itaukei ni qele me keimami mai raica na vanua o ni tiko kina ka me keimami vakasamataka tale tiko ga na veika oni lako curuma tiko na iTaukei ena veisiga ni bera ni keimami tuvana e dua na ka me baleti kemuni,” e kaya o Nata.

Na imatai ga ni vanua a qaravi kina na bose vaka oqo oya na koro o Dratabu mai Nadi – na nodra vanua na Momo nai Taukei Navo, Ratu Meli Saukuru

Na vanua o Bureonoco e wili tiko kina na koro o Nabudrau, Nakuruwai, Nacuru, Taci, Nakauwaru, Navaka, Matanimoli, Naqarani, Naivilaca kei Narocake.